ढुङ्गे फूलः बालकविता

 

ढुङ्गे फूल (बालकविता)

- रमेशचन्द्र घिमिरे

ढुङ्गे फूल बनाउने हो आज म पनि

ल्याएको छु खोजेर ठूलो छपनी

फेबिकलमा काठको धुलो मुछेर

दल्नुपर्छ लपक्क ढुङ्गा पुछेर

ठुल्ढुङ्गामा ससाना ढुङ्गा टाँस्ने हो

त्यसकै तल लहरा र पात गाँस्ने हो

दिदी भन्छिन् अचम्मको रैछस् तँ पनि

कताबाट भेट्टाइस् हँ ठूलो छपनी ?

मन्दिराको पर्खालबाट मैले तानेको

ती दिदीले भनेरै हो मैले जानेको

बाटुला र लाम्चा ढुङ्गा खोज्न लगाइन्

मैले खोज्दा उनले नि मलाई सघाइन्

ढुङ्गे फूल फुलाउने थियो सपनी

पाएँ मैले मजाको ठुुलो छपनी ।

---------

२०८०/०७/१०