स्वर्गबाट इन्द्रेणी धर्ती हेर्न झरेको !
"निधारमा रङ्ग्याउन सप्तरङ्गी टिकी
तिहारमा लगाइदेऊ न त्यसैबाट झिकी"
यसो भन्दै दिदीसँग मैले कुरा गरेको
जति बेला इन्द्रेणी धर्ती हेर्न झरेको !
तिम्रो रङ्गीन रूप देख्दा मनै खुसी हुन्छ
तिमीलाई नझुराउने यो संसारमा कुन छ ?
कहाँबाट कसले होला यति रङ्ग छरेको
के देखेर इन्द्रेणी धर्ती हेर्न झरेको !
वारि पारि फैलिएर रङ्ग जिउमा छरी
के हेर्दैछौ ढाड बङ्ग्याई छक्क परी परी
आफ्नै पुलको बाटोबाट आफै खोला तरेको
किन होला इन्द्रेणी धर्ती हेर्न झरेको !
- भोर्लेटार, लमजुङ ।
No comments:
Post a Comment